長洲一日遊 - 打卡、美食推介

第一站：先篤返2串大魚蛋！

🔽 第一站，當然要食返串長洲特色大魚蛋，醫醫肚！

碼頭一出大街向前行就會見到幾間魚蛋店，雖然已經好多人介紹過大魚蛋，但小編每次到長洲都會篤返2串😤
🔼 呢間長洲老字號魚蛋鋪成日都有長長人龍排隊，主打長洲必食嘅招牌大魚蛋、炸豆卜等。

唔少食客都大讚魚蛋鮮味又彈牙😋 ! 而附近亦都有主打唔同醬汁嘅大魚蛋店鋪 (小心超辣青咖哩味大魚蛋🌶️小编辣到飲左2枝野🤣)，不過山長水遠入到長洲，要試出真正嘅鮮味，當然試原汁原味大魚蛋啦！

第二站：沿住東灣泳灘散步同壁畫打卡

食飽飽後，一直向前行就會到東灣泳灘。東灣泳攤水清沙幼，係長洲最大嘅泳灘，廁所、更衣室等設施齊全，一到夏天島民都會嚟游水。如果有時間，可以留到日落，天氣好嘅話，仲會看到香港仔及南丫島迷人燈火。
🔼 東灣泳灘隔離就係觀音灣，聽講仲係香港首位奧運金牌得主、滑浪風帆選手李麗珊練習場！遊客可以係到租借風帆、獨木舟等水上滑浪設備。充滿小島風情，吸引不少人在此打卡。

🔼 未到夏天，已經見到好多人嚟曬太陽。

🏃🏻‍♂️🏃🏻‍♀️沿住東灣泳攤一直向前行，會見到有好多大大小小嘅壁畫。佢地都係由長洲嘅學校聯同本地嘅設計師人手畫上去，色彩繽紛，充滿長洲特色！
📸小編精選打卡位：沿住海邊一路行，有色彩鮮豔嘅壁畫，普通淨色衫已經好突出。

📸小編精選打卡位：附近仲有好多重設計感嘅特色壁畫設計。

📸小編精選打卡位：行到最尾仲有著名嘅長洲包山壁畫！

第三站：長洲醫院

長洲醫院獲政府列為三級歷史建築，經過大門進入醫院，入口大廳前是一道特色的「月亮門」。

🔽「月亮門」採用簡化的羅馬柱廊和拱門配以綠色及黃色的彩色玻璃窗，與港島虎豹別墅之地下大廳相似，醫院大堂亦放置了胡文虎的雕像。
過去85年，長洲醫院見證過大時代的起落，在日佔時期長洲醫院曾經用作育嬰院和兒童難民收容所。

💡 廚房外的「神秘石頭」

🔽長洲醫院一人一物背後都有故事，其中醫院廚房門外的一塊「神秘石頭」亦引起了不少人的好奇！
20世紀初，香港政府為將長洲南部的山頂區發展為高尚住宅區，決定限制南部居民數目，並於1919年頒下法令，規定若要在長洲南部居住必須向政府申請，當時政府在界線上豎立15塊「界石」作標記。

當年15塊「界石」部分仍保存在長洲不同地方，長洲醫院正好位於昔日的「華洋分界線」上，廚房門外的花崗岩方尖柱正正是編號14的「界石」，院方尊重歷史因此予以原地保留。

❗大家拍照打卡時記得勿阻礙醫院的出入口及造成聲浪影響院內人士

第四站：拜一拜長洲天后官

長洲天后官建於乾隆三十七年（公元1772年）係同治三年（公元1865年）重修，到而家已經有超過二百四十年歷史；天后官坐南向北，係兩進式嘅廟宇。

🐟 相傳一名漁民係一次出海捕魚時，拖到一塊石頭。上岸後，老人家筊杯得知石頭係天后化身，於是西灣漁民就興建天后宮供奉，但石頭最後嘅去向就無從考究啦。

此外，每年嘅太平清醮巡遊日，廟前就會搭建嘉賓台，有各式各樣嘅表演。廟前街道寬闊，附近都可以租單車，係長洲遊客必到地方。
🙏🏻過去大部分長洲居民以捕魚為業，經常要同惡劣嘅天氣搏鬥，為咗希望每次出海都能平安返家，所以就會尋求讓海神保護，以天后最為普遍。

🔼 行咗咁耐，係時候飲杯嘢抖一抖。長洲近幾年引入好多特色嘅飲品鋪頭，好似手上呢枝就係香港本地釀製嘅話梅梳打。

入口酸酸甜甜，好解渴！除咗大大小小嘅本地品牌外，鋪頭入面仲有世界各地唔同味道嘅啤酒，例如朱古力啤酒、芫荽啤酒🤢、陳皮啤酒等等...鋪頭入面仲設有坐位，有興趣嘅朋友仲入去坐，同店員傾下計，熱情嘅店員好樂意介紹每款啤酒嘅味道！

🔼 飲完酸酸甜甜嘅話梅梳打見有啲肚餓?小編帶你去長洲名店，食出名嘅炸雞髀同蠔仔肉碎粥 !

唔好睇蠔仔肉碎粥好似其貌不揚咁，但食落味道好有驚喜！稀身粥底加上好多鮮甜嘅蠔仔，入面仲加咗冬菜，夠晒惹味。調味都做到恰度好處，唔會太咸或太淡😋。

🔼 而炸雞脾可以揀辣同唔辣，亦都有好多種唔同程度嘅辣度比大家揀，真係岩晒食辣嘅朋友！肉汁滿滿，而且唔係你普遍厚厚嘅炸皮，外脆內嫩，真係小編暫時食過最好食嘅炸髀，對佢依然好有印象😋。

第五站：愛情鎖

💡最後一站就到著名嘅「長洲愛情鎖牆 Lock of Love」打個咭！五顏六色既心心木板同鎖掛埋一齊，影出嚟畫面超靚。
🔼 全部都係大家既願望同承諾，仲可以約定身邊個個，下次再黎搵返自己個鎖！不過記住唔可以自己帶私家鎖去，店家會剪鎖㗎!

📸小編精選打卡位：呢個位咁colorful，絕對係必到嘅打咭位！除咗寫字，仲有好隱世畫家呢！

從天后廟沿途行返碼頭，會見到好多賣乾曬海產店舖，海產種類都唔少，好似蝦乾、椒鹽白飯魚仔等，所以鍾意食海產嘅朋友千祈唔好錯過！

後記:

🔼 小編沿路見到有小店在生曬咸蛋肉餅（原來是烘過的臘腸肉）；忍不了手買了一包回家蒸來食😍蛋黃金黃冒油；臘腸咸香，適合做「救急餸」，頭痕想不到今晚食乜餸可以與家人分享😬

距離碼頭行入少少，途中會見到有好多貓貓。大部分都好乖、唔怕人，鐘意貓嘅朋友嚟到，一定會令你樂而忘返！
大家愉快遊覽時謹記勿打擾島民的生活；祝大家行得開心食得滿足！

可乘坐巴士到港島國際金融中心（IFC）/ 港鐵香港站或中環站下車，往維港方向走大概8分鐘左右到『中環碼頭』

地址：長洲(中環五號碼頭)
▹ 船程
高速船 35-40分鐘
普通渡輪 55-60分鐘

▹ 票價
星期一至六：
高速船: $29.2
普通渡輪（豪華位): $23.2
普通渡輪（普通位): $14.8

星期日及公眾假期：
高速船: $42.3
普通渡輪（豪華位): $33.8
普通渡輪（普通位): $22

❗長者、小童及傷殘人士半價 ;「2元乘車優惠」適用於高速船及普通渡輪普通位，坐普通渡輪豪華位則需補回差價）

💡 要在長洲最直接嘅交通就係在中環(5號碼頭) 搭船，船嘅班次非常穩定，坐快船最快35分鐘就到！